نفسك تكون ايه من لا مؤاخذه الحيوانات !!!!!!!!!!!!!!!!!

لو عاوز تكون لا مؤاخذه حيوان .. نفسك تبقي إيه ؟

من غير زعل يعني ؟ لو عندك الفرصة انك تتقلب حيوان .. وتعيش حياه تانيه في شكل حيواني ..تحب تكون إيه ؟
طيب أنت عارف الأول إيه مميزات عالم الحيوان ده ؟
أولا مافيش مدارس.. مافيش طابور عيش .. مافيش مواصلات زحمه .. حياه.. كل اللي فيها أكل وشرب وراحة وشغل وجواز ولعب وخلاص.. مافيش أي مشاكل بتاعت يا عمي أنا لسه متخرج ومش لاقي شقه ومرتبي علي قده .. خالص .. نيفر .. ولا سقطت يا فاشل .. تلات سنين ف الثانوية العاميه .. طيب ما هي عاميه يبقي أنا اللي مفتح . ؟ ومافيش كمان كمبيوتر ولا نت ولا شات ولا موبايلات أو ميسدات .ولا الخنقه بتاعت معاك كام ولا بتشتري اللبس منين ولا عايز جزمه جديدة ومش لاقي .. ولا البت بتاعتك بتتقل عليك ولا الواد بتاعك بيشتغلك ..
وزى ما فيه بين الناس تفاوت طبقي رهيب برضه بين الحيوانات فيه تفاوت طبقي رهيب .. يعني لا مؤاخذه كلاب وقطط وفيران وتعابين وسحالي وسلاحف الناس الذوات .. مش زى بتوع الفقرا يعني القطه مثلا اللي في بيت أي حد من الذوات بتاكل أحسن منك أنت شخصيا وأنت بني ادم وهي بني قطط .. ونفس القطه لو في الشارع بتنضرب بالشوز ..
طيب فتش كده جواك وشوف أنت فيك صفات من مين .. ؟ وبالتالي مين اقرب صوره حيوان ممكن تتجسد فيها .
مش حاقولك حمار لان مافيش حد يتمني يكون حمار .. تاني .. كفاية عاش عمره اللي فات كله حمار .
ولا كلب متشرد لان العيال حاتضربه .. ولا قط إلا إذا كان حايبقي بتاع ناس واصله واغنيا جدا وساعتها الأكل اللي هو حايكله ممكن يأكل أسره من الطبقة المتوسطه والشامبو والرفاهية وكل حاجه حلوه . لكن مين يحب يتحبس ويعمل كل حاجه بميعاد عند الناس دي .
يمكن أسد ..حر في غابة طليق الكل يخاف منه .. ويعمل له ألف حساب أو نمر سريع وجميل . أو غزال ـ طبعا البنات كلها عايزه تبقي غزلان والولاد عايزين يبقوا اسود ونمور ـ
لكن كم واحد فينا حايبقي فيل لان صفاته الجسمانيه والنفسية تؤهله انه يبقي كده يعني حجمه كبير وقوه تحمله كمان كبيرة .. كتييييير
وكام واحد صفاته النفسية والجسمانيه تؤهله انه يكون فار بيخاف ويهرب ويكتفي بأي أكل .. أو تعبان يلف حوالين الناس وبعدين يلدعهم .. أو جمل – اعتقد الصبر اللي إحنا فيه يبقي كلنا جمال –
وكام احد منا ممكن يكون نعامه مش قادر يواجه حياته والضغوط اللي فيها
وكام واحد ممكن يبقي تعلب يخطط ويرسم ويتكتك لحد ما يوقع ضحيته .. أو ضبع دنيء بياكل لحم أخواته .. أو حتى معزه . مش فاهمه حاجه في أي حاجه خالص .
علي فكره شكلنا كده كلنا حانطلع في النهاية لا مؤاخذه معيز
طيب لو اخترت للي حواليك إنهم يكونوا حيوانات مين يبقي إيه ؟
يعني لو اخترت لرئيسك في الشغل انه يكون حيوان .. تفتكر حايكون إيه ..؟ غير حمار طبعا .
وولادك ..؟ أكيد قرود.
وجيرانك اللي مطلعين عينك وبيرموا الزبالة من فوق علي بلكونتك .. ؟ أكيد بقر .
وسواق التاكسي اللي بيرفض يركبك عشان مش رايح الحته البيئة اللي أنت رايحها دي ويبص لك من فوق لتحت كأنه سايق قطر مش تاكسي .. أكيد كلب وابنه كمان.
ولا البقال اللي لما تشتري منه حاجه ترجع البيت تلاقيها ناقصة النص .. ولا مندوب المبيعات الممل اللي بيخبط عليك ويصمم انك تشوف معاه إيه ويدبسك في الأخر في حاجه أنت مش عايزها خالص .. ولا الركاب اللي بيركبوا معاك المواصلات كل يوم ونفسهم يقتلوك عشان يخلصوا من واحد بيزاحمهم ..
ولا الفران اللي بيعملك عيش لو أديته لكلب مايرضاش ياكله .. أكيد ..." اتركها لخيالك بقي "
ولا الـ.......... " ودي كمان لخيالك اصل الجبن سيد الأخلاق " .
علي فكره الحيوانات دي مش شتيمة يا جماعه خالص بالعكس يعني حياتها أحسن مننا شويه .. ما فيش عندها مشاكل غير إنها تأكل وتشرب وتتجوز وخلاص .. وتعيش بالسليقة " إيه السليقة دي بقي ؟" يعني مافيش قانون عندها أي حد فيهم يعمل أي حاجه وكمان القوي هو اللي بيحكم وهو اللي بيغلب ويسود والكبير فيهم هو أهم واحد يعني كل ما زاد الحجم والقوه والسرعة زادت الأهمية " بيتهيألي إننا عايشين كده برضه في حياتنا يعني ما بعدناش عن واقعنا كتير "
طيب في النهاية واجه نفسك وقول لها أنت شبه مين من الحيوانات وأوعي .. أوعي .. أوعي الجمبري يعضك .